صلاة نهاية سنة ٢٠٢٠

إلهنا الطيب نشكرك.. نشكرك رغم كل الآلام وكل الظروف وكل الأوجاع.. كل الأحزان..

كنيستنا علمتنا نشكرك.. أبائنا علمونا نشكرك..

إنت علمتنا يا رب نشكرك حتى لو تعبانين.. وتايهين وحيرانين..

نشكرك يا رب لأنك وصلت ناس كتيرة السما.. وادتهم أكاليل وأفراح..

نشكرك يا رب لأنك عبَّرت الموت على ناس كتير من شعبك..

لكن.. أنقذتهم وقومتهم كأنهم قاموا من الأموات..

نشكرك يا رب على الناس اللى اتعزِّت رغم آلامها.. وقربت منك رغم أحزانها.. واتعلموا الإيمان.. واتعلموا الإتكال..

وبكوا قدامك بعد ما كانت عنيهم ناشفة.. وقلبهم ناشف..

نشكرك على كل نفس سمعت الإنذار وتابت واتضعت وخافت خوف مقدس..

نشكرك يا رب لأنك ما بتغلطش فى أحكامك.. كل اللى بتعمله بيطلع صح.. دايما صح..

نشكرك يا رب لأنك قريب من ولادك.. بالذات المجروحين والتعبانين.. ماحدش بيعزيهم غيرك ولا حد يحس بوجعهم زيك..

نشكرك يا رب إن فى هذه جميعها: فى الشدة والضيق والآلام بأشكالها يعظم إنتصارنا بك وحدك يا رب لأنك أحببتنا..

نشكرك على غفران بتديهولنا مجانى ما نستاهلوش..

أشكرك على حب بلا حدود.. وصبر كمان بلا حدود..

استحملتنا يا رب كتير ولسة مستحمل مننا..

كل أنواع البلادة والعند والتذمر والشك والخوف والقلق وعدم الإيمان.. وعدم محبتنا لبعض..

مستحمل مننا صلوات فاترة.. مستحمل مننا تكاسل فى كل طلب وكسر لوصاياك..

أتركها هذه السنة أيضاً يا رب! لا تأخذنا فى نصف أيامنا.. ادينا زمان توبة يا رب! بقى كل يوم فى العمر دين علينا ليك يا رب.. بعد ما شوفنا الموت بيقرب أوى..

ساعدنا كل يوم نقدمهولك من الصبح لبليل ننتظرك.. نملاه حب .. نملاه صلاة.. نملاه خير.. نملاه تعب..

ساعدنا يا رب نعيش ليك ونبطل نعيش للدنيا ولنفسنا..

سامحنا يا رب على خطايا بلا عدد.. إنت اللى عارفها أكنر مننا.. إنت شايف جوة وبرَّة..

إن حصرنا خطايانا هى أقل كتير من الحقيقة..

لكنها مش أكتر من رحمتك.. رحمتك واسعة جدا.. قطرات المطر ورمل البحر، برضو رحمتك أكتر..

سامحنا على خطايا الفكر والحواس والإرادة..

سامحنا على عنينا كان مفروض نخلعها.. وايدينا كان مفروض نقطعها.. وحاجات كتيرة كان مفروض نغيرها..

وإحنا مش خايفين من الهلاك بس انت يا رب خايف علينا من الهلاك..

تتأنى وتتأنى.. وتفتقدنا بكل الأشكال..

تطبطب قد ما تطبطب.. وبعدين تشد قد ما تشد..

وفى كل دة.. لا نشاء أن يهلك أحد..

احسبنا يا رب كلنا مع الابن الضال اللى راجع بيتك.. ما يستاهلش يبقى خدَّام عندك..

لكن عشمانين يا رب فى حضنك الأبوى.. فى جريَّك علينا وإنت بتحضنَّا.. وتُقبِّلنا.. وتدخلنا بيتك تانى..

وتقول لنا: فرحتونا.. فرحتوا السما كلها..

افتح أبواب كنيستك تانى يا رب! لكل التائبين اللى عرفوا كرامة كنيستك وبيتك..

افتح لينا أبواب السما يا رب برحمتك! علشان كل واحد يجهز يسافر على خير.. ويستقبلوه الحبايب اللى فى السما..

إرحمنا يا رب إرحمنا.. لأننا كثيرا ما امتلأنا هواناً وعاراً..

قوينا على نفسنا يا رب.. قوينا على دماغنا..

نعترف أمامك إن إيماننا أضعف جداً مما تصورنا.. إحنا فين من الشهداء اللى بيدخلوا على الموت بفرح!

وفين يا رب من الموج العالى اللى قابلوه ولادك طول حياتهم..

ثبِّت إيماننا يا رب.. وثبَّت إيماننا عليك.. وثبِّت عنينا عل سما..

إنزع مننا الفتور يا رب والزهق والكسل والنوم.. وكل يوم طلع غالى.. خلينا نلحق يا رب ونسابق الوقت.. علشان نستعد..

أذكر يا رب كل المتألمين.. كل الباكين والحزانى.. كل المجربين بكل الأشكال..

كل اللى صعبان عليهم منك يا رب.. طيب خاطرهم..

ماحدش يعرف يصالحهم غيرك! ويعزيهم غيرك!

إرفع يا رب عن العالم بصلوات كنيستك، قديسيك، أنبيائك ورسلك وشهداءك وقبلهم أمنا العدرا.. إرفع عن العالم الموت والوباء والغلاء والجلاء وسيف الأعداء.. وكل أمر ردئ..

إرفع يا رب عن العالم لأن الناس تعبت! وأنِّت! واثقين إن حساباتك أفضل من حساباتنا.. وأفكارك أعلى كتير من أفكارنا..

لكن نترجَّى رحمتك! ونقولك يا رب أسرع وأعنِّى!

نجى ولادنا اللى بعدوا عنك، رجعهم لحضنك.. أرسل فعلة قديسين لحصادك لأن الحصاد كتير.. فى بلادنا وفى العالم كله..

أذكر يا رب كل صرخة! من كل جعان وعطشان.. من كل متألم ومريض.. مش لاقى حد جنبه.. لازم يلاقيك.. ويلاقى ملايكتك..

فرح العالم يا رب! وخلى العالم يرجع لك بالشكر.. زى ما دخلت عالمنا تصلحه من الخراب اللى فيه.. إرجع تانى وتحنن على جُبلتك يا رب.. وشِد الناس شَد ليك يا رب..

إملانا بروحك القدوس المعزى.. واملانا بثمر الروح.. وحط فى قلبنا السلام الذى يفوق كل عقل!

خلينا فوق الدنيا دى كلها.. مركزين فيك فرحانين بيك.. وواثقين فيك تمام الثقة.. إنك تاخدنا يوم بيوم لغاية حضنك.. وأبديتك..

يا رب الناس مشتاقة تتناول! إرجع يا رب وتحنن وافتح البيت.. علشان الكل يسجد قدام هيكلك..

ونقول بصوت واحد: نسجد لجسدك المقدس ودمك الكريم

أذكر يا رب خلاصك فى كل الشعوب.. أذكر اللى سألونا نذكرهم قدامك يا رب..

بارك إكليل السنة بصلاحك.. من أجل فقراء شعبك.. من أجل الأرملة واليتيم والغريب والضيف.. والمريض.. والمعوق.. والمهان.. والمتألم بكل نوع..

إرحمنا كعظيم رحمتك.