“
صوم العذراء مريم وعيد صعود جسدها في الأيام دي بتاخدني لذكريات جميلة ، لأيام الطفولة في الكنيسة ، وأجواء صوم العدرا الجميلة بتاخدني لذكريات كتير مننا مر بيها لما كنا نروح نصلي كل يوم قداس الصبح وبعد القداس نعلي صوت الترانيم والتماجيد لأم النور جوة الكنيسة .
ونفضل طول اليوم موجودين جوة الكنيسة نوضبها علشان النهضة بليل ، ونيجي بليل علي النهضة نلاقي الشعب جاي قبل بدايتها بساعات علشان يلاقي مكان جوة الكنيسة ونعمل العشية والتمجيد وكل شماس مننا يستني اسمه إللي مكتوب في الجدول مع رئيس الشمامسة علشان نمسك الصليب أو الصورة أو البخور في زفة العدرا ، وتعلي التماجيد ويصعد البخور وتعلي صورة العدرا وسط الناس في الزفة ، ويبقي فرحتنا كلها في تعبنا وخدمتنا جوة الكنيسة .
وبعد النهضة نقعد كلنا ناخد أغابي مع بعض وبعدها نصلي تسبحة نصف الليل ، ذكريات جميلة بتاخدنا في الأيام دي ، ذكريات محفورة جوة قلوبنا مش بتتشال مهما اتغيرت الأيام أو حتي اتغيرت قلوب الناس.
في عيد العدرا السنه دي عاوزين نرجع بساطتنا جوة الكنيسة بساطتنا إللي راحت مننا ، لما كنا صغيرين كان مايهمناش غير أننا نفرح جوة كنيستنا لكن لما كبرنا اهتمامتنا جوة الكنيسة اتغيرت وبساطتنا قلت مع ربنا ومع بعضنا .
تعالوا نتعلم من أم النور زي ما بنقولها في التسبحه ( العابدة والأم) رغم أنها أم المخلص ، لكن احتفظت ببساطتها أنها عابدة ومانسيتش أبدا أنها إنسانة . عاوزين في الصوم ده نطلب ونتشفع بأم النور أنها ترجعنا تاني لحياة العبادة في التسبحة في لبش واطس في ثيئوطوكية الجمعة ( أنت هى الصنارة العقلية التى تصطاد المسيحيين وتعلمهم السجود للثالوث المحى) وده أجمل ما قيل عن فكرة الشفاعة أن العدرا صنارة في أيد ربنا يصطاد بيها كل واحد بعيد عنه ، تعالوا في الصوم ده نقول العدرا اصطاديني يا عدرا لأبنك ، اصطاديني وعلميني العبادة رجعي لحياتنا البساطة إللي افتقدناها ، رجعي فينا الخدمة الحقيقية زي خدمتك في الهيكل أنتي أم قادرة رحيمة معينة ، خلي صوم العدرا وعيدها السنة دي يبقي صوم تغير حقيقي .زي مابنقول في قطع صلاه الغروب ( فهيئي لي أسباب التوبة أيتها العذراء) خلي دي صلواتنا خلال الصوم نقولها ساعديني يا أم النور علي التوبة ساعديني أرجع لحضن ربنا زي الأطفال خلي حياتنا يا عدرا مليانة بنور المسيح .
علشان نقول في نهاية حياتنا (وعند مفارقة نفسي من جسدي أحضري عندي ولمؤامرة الأعداء أهزمي ولأبواب الجحيم أغلقي لئلا يبتلعوا نفسي.) .
اجعلي يا عدرا أيام صومك أيام رجوع ونجدد أيامنا كالقديم .